Joan den larunbatean bukatu zen Santurtziko Nazioarteko Antzerki Jaialdiaren 30.edizioa. Oraingo honetan gainditu egin dugu aurreikusitako ikuslego kopurua. Aretoa erabat bete zen ordaindu beharreko ikuskizunen erdia ikusteko, eta %80 baino gehiagoko okupazioa izan genuen beste hainbat ikuskizunetan.
Jaialdian 10.000 ikusle izan dira, areto barruko ikuskizunetan 8.000 lagunek hartu dute parte, eta kalekoetan, Gernika parkean, 2.000 lagunek.
Bereziki pozgarria izan da gazteentzako emanaldietan jaso dugun erantzuna, aste barruan egin diren arren, aretoaren %60 baino gehiago bete da eta.
Jaialdia urriaren 23an hasi eta azaroaren 28an amaitu da. Guztira, 24 ikuskizun izan ditugu, horietako 4 kalean, 1 Kresala aretoan eta gainontzeko 19ak Serantes aretoan.
Horrez gain, SAREAren (antzerkien euskal sarea) bilera Santurtzin egin zen (Jaialdiaren gonbidapena). Bilera horretan Autonomi Erkidegoko 53 antzerki guneetako arduradunetatik 47k hartu zuten parte. Koordinazio bilera hau ez ezik, kontratazio artistikoarekin lotutako gai teknikoei eta aurrekontuen kudeaketari buruzko formazio tailerra ere burutu zen egun horietan, jaialdiaren antolakuntzapean.
Jaialdiaren kostuaren %85 diru-laguntzen eta txartelen salmentatik ateratako diruaren bidez ordaindu da.
Alde artistikoari zein ikuslegoaren erantzunari dagokionez, oso jaialdi ona izan dela uste dugu. Antzerki jaialdia duela 30 urte hasi zen. Artean, ia amateurra zen eta oso aurrekontu txikia genuen. Baina ordutik hona asko ibili gara, eta gaur egun Santurtzik lehen-mailako kultura-ekintzak eskaintzen ditu. Izan ere, erakundeek gure herriaren ezaugarritzat hartzen dute antzerki jaialdia. Eta are garrantzitsuagoa dena, herriaren onespena dugu, urtetik urtera ikuslegoa gora doa eta.
Gure ustez, Serantes Kultur Aretoak jaialdiaren ezaugarriak eta egitaraua herritarren artean zabaltzeko egin duen ahaleginak zerikusi handia izan du aurtengo edizioan lortu dugun arrakastan. Gaur egun, Serantes Kultur Aretoak web orri garrantzitsua du. Horrela, web orria zein tuenti edo facebook bezalako sare sozialak erabili ditugu jaialdiaren berri emateko.
Era berean, izugarri igo da Serantes Kultur Aretoko bazkideen kopurua. Azken urteotan hirukoiztu egin da abonatuen kopurua, eta gaur egun 1.300 bazkide gehiago daude.
Bestetik, metroa Santurtziraino heltzeak ere eragina izan du aurtengo igoera honetan, beste herri batzuetako biztanle askori aukera eman baitie gurera etortzeko, hiri handietan erakusteko moduko ikuskizunak eskaintzen dituen gure antzerki xume honetara etortzeko hain zuzen.
