Denon gogokoak eta oso jendetsuak, eguraldia gorabehera
Eguraldia beti lagun izan ez dugun arren, 2008ko Karmengo jaiak oso jendetsuak izan dira. Bertan egon diren guztiok izan dituzte oso gogoko, bai santurtziarrek eta bai gure zaindariaren omenez egiten diren hamar jai-egun hauetan gure herrira gerturatu diren bisitariek ere.
Serantes Kultur Aretoak eta Udaltzaingoak egindako kalkuluen arabera, 350.000 lagunetik gora ibili dira jai-gunean programatutako 145 ekitaldiak gozatzen.
Programatutako ekitaldi guztiak egin ziren, jaietako lehenengo igandean egitekoa zen JULE kale-antzerkia izan ezik, eguraldiak ez baitzuen muntatzeko aukerarik eman; egia esan, euria ia egunero izan dugu bisitari, baina zorionez, ez da aitzakia izan jendea kalera atera eta programatutako ekitaldiak goza zitzan, nahiz eta egia den, horrek, ekitaldi batzuetan, espero baino jende gutxiago egotea eragin duela.
Dena dela, euriarena bitxia da, batzuetan jaietarako lagungarri izan zaigu eta. Adibidez, astelehenean, Karmen egunean bertan, goiz desatsegina izan genuenez, jende askok hondartzarako plana alde batera utzi zuen. Baina arratsalderako eguzkia atera zen eta milaka lagun itsas prozesioa ikustera joan ziren. Horrela bada, 25.000 lagunetik gora batu ziren portuan eta Prozesioaren ibilbidean, eta gerorako programatuta zeuden ekitaldietan ere parte hartu zuten.
Izan ere, astelehen gauean, su artifizialak eta gero, kontratatutako bederatzi kontzertuetatik jendetsuena izan genuen, Sergio Dalmaren kontzertua ikusteko 15.000 lagun baino gehiago elkartu ziren eta.
Gainerako kontzertuetan aurreikusitako jende kopurua batu da, Santurtziko Txistulari Bandak eta Tolin Mariatxiak ostiralean, hilak 13, eman zuten kontzertuan izan ezik, non 1.000 lagun baino ez ziren egon; espero zen baino askoz ere jende gutxiago. Gure ustez, berau hasi baino ordu erdi lehenago erori zen euri-zaparradaren ondorio zuzena izan zen.
Larunbatean, hilak 14, herriko banden rock-kontzertuan 1.500 bat ikusle batu ziren.
Igandean, Musika Bandak eta Korrontzi taldeak eman zuten kontzertuan, non Santurtziko dantza-talde guztiak eta herriko beste erakunde batzuek ere hartu zuten parte, 4.000 lagun bildu ziren.
Asteartean LA RAIZ taldea ikusteko 12.000 lagun baino gehiago bertaratu ziren; En Tol Sarmientoren kontzerturako, berriz, 5.000 bat lagun eta Alvaro Solerrek emandakorako 13.000tik gora.
Seguridad Social eta Doctor Deseo taldeek emandako kontzertu bikoitzean 10.000 lagunetik gora elkartu ziren, eta larunbatean, hilak 21, Vulcano Orkestrak 12.000 lagun jarri zituen dantzan hiru ordu baino gehiagoz.
Oso jai jendetsuak izan dira, gure udalerrian aspalditik ohi denez. Berorien diseinu eta programazioan herriko talde ugarik hartu dute parte, besteak beste, erroldatuta dauden 80 kuadrillek (55 heldu-kuadrilla eta 25 ume- kuadrilla), zeinek, jai batzordearen eskutik kolorez, giroz eta alaitasunez betetzen dituzten gure kaleak. Polita da kontua, baldin eta aintzat hartzen badugu garai bakoitzean santurtziar belaunaldi oso batek hartzen duela parte, izan ere, aurten 1.500 kuadrillakide erroldatu dira.
Jai batzordeak kuadrilletarako antolatutako hamaika ekitaldiez gain, beste 39 ekitaldi ere izan dira, Santurtziko arlo guztietako elkarteek publiko ororentzako programatuak eurak. Azken batean, herritar gehienek goitik behera ibilitako egitaraua, hauxe izanik gure jaietako ezaugarririk garrantzitsuena. Gainera, Mentxu maskota ere ikur handia da, badugulako, nolabait, identifikatuko gaituen plastikozko “irudikapena”. Bera da jaietan ikur maitatuenetako bat, izan ere, Mentxu agertu eta makina bat lagun inguratzen zaizkio, batez ere umeak. Esate baterako, asteartean egin zen Kalejiran 2.000 lagun baino gehiago ibili ziren.
Horrela bada, hamar jai-egun handi eta biziren ostean, igande gauerdian Mentxuk agurtu egin gintuen eta 2019ko jaietarako hitzordua jarri zigun. Baina alde egin aurretik, 2018ko Gorka sarien banaketan egon zen, honako hauek lortu zutelarik sari preziatua:
1.- HAUR-KUADRILLEN JANZKERARIK ONENA:
– ESANDA ETA EGINDA
2.- HAUR-KUADRILLAKIDERIK ONENA (NESKATOAK):
– NAIA (KATXIONDOS)
3.- HAUR-KUADRILLAKIDERIK ONENA (MUTIKOAK):
– AITOR (FESTAKO ERREGEAK)
4.- HAUR-KUADRILLARIK ONENA:
– GUZTIZ JOANDAK
5.- ARGAZKIRIK ONENA:
– GARAITEZINAK
6.- JANZKERARIK ONENA:
– HAZ-T
7.- EMAKUMEZKO KUADRILLAKIDERIK ONENA:
– SANDRA (A ÚLTIMA HORA)
8.- GIZONEZKO KUADRILLAKIDERIK ONENA:
– MARKEL (SORROMORROPIKOTAIOKE)
9.- KUADRILLARIK ONENA:
– CEDA EL VASO
Aurten gorabehera larririk gabeko jaiak izan ditugu, jendetsuak, parte hartze handidunak eta herritar gehienon gogokoak, egitarauan denok izan baitigu gure neurriko ekitaldiren bat.
