Pazko astelehenean Santurtziko Kornites-erromeria tradizionala egingo da. Aurten erromeria-jaiak, zein Santurtziko Udaleko Kultura Arloko “Serantes Kultur Aretoa” Erakundeak antolatzen duen, berrikuntza dakar, gida batek lagunduta igotzeko eta gotorlekua barrutik ikusteko aukera egongo da eta.
Mazo muinoan eguerdiko hamabiak aldera umeak jolasteko parkea hasiko da, non herri-jokoak egongo diren bazkaltzeko ordura arte. Arratsaldeko 16:00etatik 18:30era berriro jarriko da abian umeentzako parke berezia, eta gero erromeria egongo da Dangiliske Plaza Dantza Taldearekin.
Esan bezala, lehenengoz antolatu da Serantes mendirako igoera, gida batek lagunduta. Txango osoa doan izango da, eta goizeko 11:00etan irtengo da Santurtziko Udaletxeko atetik. Bertan ingurune natural eta historiko honen hainbat alderdi ezagutaraziko dizkigute. Parte hartzeko Turismo Udal Bulegoko telefono zenbakira deitu behar da: 94 483 94 94 edo posta elektronikoa bidali turismo@santurtzi.net helbidera.
Horrez gain, Arantzadi Zientzia Elkarteak, gotorlekua birgaitzeko eta Serantes mendiko habitata berreskuratzeko lanak egiten diharduen elkarteak, erakusketa bat antolatuko du, non Serantes mendiko fauna eta florari buruzko argazki eta panelak erakutsiko diren. Han Serantes Natura Eskola Tailerrak gotorlekuaren birgaitze-lan eta Serantes mendiko bioaniztasunaren inguruan egin duen lana ere ikusgai egongo da.
Serantes Natura Eskola Tailerrak euren jardueraren berri emango duen bideoa proiektatzeaz gain, egunean zehar bisita gidatuak egingo ditu gotorlekuaren barruan, bertan egiten ari diren lanen nondik norakoak azaltzeko.
Serantes mendiak mota guztietako igoerak egiteko aukera ematen du, aldapa handiko bidexkak ditu kirolarientzat, eta baita mendian gora doan errepidea ere, paseo soil eta atsegina baino egin nahi ez duten horientzat, gainera oinez, bizikletaz edo zaldiz igo daiteke. Batzuk goizez joaten dira, beste batzuk, berriz, arratsaldez, baina badira egun osoa mendian ematen dutenak ere. Eta jatekorik eramaten bada, bertan mahaiak eta eserlekuak daude bazkaria edota askaria erosoago jateko.
Berezia da ohitura hau, eta deigarria Ezkerraldea bezalako hiri-gune honetan landa-inguruneetako tradizio hau gorde izana. Gainera, Kornitesera santurtziarrak ez ezik, Ezkerralde eta Meatzalde osoko lagunak ere etortzen dira.
